چناب کالج چنیوٹ میں محفل میلاد مصطفی ﷺکا انعقاد ہوا ۔ ڈی پی او چنیوٹ کیپٹن (ر) مستنصر فیروز نے بطور مہمان خصوصی شرکت کی۔ ڈی پی او نے محفل میلاد میں خطاب کر تے ہوئے کہا کہ جہاں ہم نبی پاک ﷺ کی مداح سرائی کر رہے ہیں وہاں ہم پر یہ لازم ہے کہ نبی کریم ﷺ کی بتائی ہوئی تعلیمات پر عملدرآمد کرکے ہم خود ایک اچھے انسان بنے اور اس معاشرے کو اپنے لیے اور اپنی آنے والی نسلوں کے لیے بہتر بنائیں ۔

یہ کیسے ممکن ہے کہ ایک نبی پاک کا امتی ہو اور جھوٹا ہو ، امتی ہو اور دھوکے باز ہو ، امتی ہو اور اپنے ساتھ والے مسلمان بھائی کو کافر کہے۔ یہ کیسی قوم ہے جو امتی ہونے کا دعویٰ بھی کرے اور بچیوں کی پیدائش پر غمزدہ ہو ،یہ ممکن نہیں ہے۔ہمیں اس بات کی ضرورت ہے کہ کوئی بھی دن جو اسلامی تعلیمات کا سبق دیتا ہے اس کی روح کو سمجھیں ۔ جس دن اس قوم نے اور ہم سب نے اس دین کی اور نبی پاک ﷺ کی تعلیمات کی روح کو سمجھ لیا تو اس دن اس امت کو اس ملک کو ترقی سے کوئی نہیں روک سکتا۔